സ്‌കൂള്‍ വിദ്യാഭ്യാസ സമയത്ത് തന്നെ സിനിമയിലെത്തിയ ഒരു പഴയ കാല താരമുണ്ട് മലയാളത്തില്‍. ഒരുപിടി നല്ല സിനിമകളില്‍ അഭിനയിച്ച് ജനപ്രിയയായി മാറിയ താരം. ഇന്ദ്രജയെ അത്ര വേഗത്തിലൊന്നും പ്രേക്ഷകര്‍ മറക്കില്ല. ചെന്നൈയില്‍ ഒരു തെലുങ്ക് കുടുംബത്തില്‍ ജനിച്ച ഇന്ദ്രജ തെലുങ്ക് സിനിമകളില്‍ നിറഞ്ഞു നില്‍ക്കവെയാണ് മലയാളത്തിലും എത്തിയത്. ഉസ്താദ്, ക്രോണിക് ബാച്ച്‌ലര്‍, മയിലാട്ടം, എഫ്‌ഐആര്‍ തുടങ്ങിയ കുറച്ചു സിനിമകളേ മലയാളത്തില്‍ ചെയ്തിട്ടുള്ളൂയെങ്കിലും നടി ഇപ്പോഴും മലയാളികള്‍ക്ക് പ്രിയങ്കരിയാണ്.
ഒരു അഭിമുഖത്തിനിടെ ഇന്ദ്രജ പറഞ്ഞ വാക്കുകള്‍
അച്ഛന് എന്‍ഫീല്‍ഡ് ഇന്ത്യയില്‍ ജോലി ചെയ്യുകയായിരുന്നു. അതിന് മുമ്പ് കലാ രംഗത്ത് പ്രവര്‍ത്തിപ്പിച്ച അനുഭവങ്ങളുമുണ്ട്. ചെറുപ്പത്തില്‍ ഒരു സിനിമയുടെ ഷൂട്ട് കാണാന്‍ പോയിരുന്നു. അവിടെ വെച്ച് ബാലതാരമായി അഭിനയിക്കാന്‍ അവസരം കിട്ടി. സ്‌കൂള്‍ വിദ്യാഭ്യാസ സമയത്താണ് സിനിമയില്‍ നായികയായി അഭിനയിച്ചത്. സാമ്പത്തിക സാഹചര്യങ്ങള്‍ കാരണമാണ് അന്ന് അഭിനയിക്കാന്‍ തീരുമാനിച്ചത്. ആ സമയത്ത് എന്റെ കൂടെ സിനിമയിലെത്തിയ നിരവധി പേര്‍ക്ക് സാമ്പത്തികമായി കുടുംബത്തെ സഹായിക്കേണ്ട സാഹചര്യമായിരുന്നു. അച്ഛന് ഒരുപാട് കടങ്ങള്‍ ഉണ്ടായിരുന്നു. സിനിമയില്‍ വരുന്നതിന് അത് ഒരു കാരണമായിരുന്നു. പക്ഷെ സിനിമയിലെത്തിയത് വിധിയാണെന്ന് കരുതുന്നുവെന്നും ഇന്ദ്രജ പറഞ്ഞു.
അതേ സമയം പഠനം നിര്‍ത്തിയതില്‍ ആദ്യം അമ്മയ്ക്ക് ചില എതിര്‍പ്പുകള്‍ ഉണ്ടായിരുന്നു. തെലുങ്ക് സിനിമയായ ജന്ദര്‍ മന്ദിര്‍ ആയിരുന്നു ആദ്യ സിനിമ. എന്നാല്‍ എന്റെ രണ്ട് മൂന്ന് സിനിമകള്‍ റിലീസായ ശേഷമാണ് ആദ്യമഭിനയിച്ച ഈ സിനിമ റിലീസായത്. യമലീലയായിരുന്നു രണ്ടാമത്തെ സിനിമ. തെലുങ്കിലെ ബ്ലോക്ബസ്റ്റര്‍ സിനിമയായിരുന്നു ഇത്. ഒരു വര്‍ഷത്തോളം ആ സിനിമ തിയറ്ററില്‍ ഓടി. ചെറിയ പ്രായത്തിലായതിനാല്‍ ഈ വിജയങ്ങളുടെ വില അറിയില്ലായിരുന്നു. അതിന് ഗുണവും ദോഷവുമുണ്ട്. ഞാനെന്ന ഭാവം ഉണ്ടാവില്ലെന്നാണ് ?ഗുണം. ദോഷമെന്തെന്നാല്‍ നമുക്ക് ഒന്നും അറിയാത്തതിനാല്‍ നമ്മുടെ പ്രതിഫലം, അടുത്തതായി ചെയ്യാന്‍ പോവുന്ന സിനിമ എന്നിവയെ പറ്റിയൊന്നും ഒരു ബോധ്യം ഉണ്ടാവില്ല. എന്നാല്‍ തെലുങ്കില്‍ മുന്‍നിര നായികയായി നില്‍ക്കുമ്പോഴാണ് തമിഴില്‍ നിന്നും അവസരങ്ങള്‍ വരുന്നത്. പക്ഷെ തെലുങ്കില്‍ തിരക്കായതിനാല്‍ കുറച്ചു സിനിമകള്‍ മാത്രമേ തമിഴില്‍ ചെയ്യാന്‍ പറ്റിയുള്ളൂ എന്നും താരം വ്യക്തമാക്കി.
Recent Comments